Farz karo hum ahle wafa hon, farz karo deewanay hon

Farz karo hum ahle wafa hon, farz karo deewanay hon
Farz karo yeh dono batein jhootee hoon afsanay hon

Farz karo yeh jee ki bipta, jee say jorh sunai ho
Farz karo abhi or ho itni, aadhi hum nay chupai ho

Farz karo tumhain khush kernay kay dhoondhay humnay bahany hon
Farz karo yeh nain tumharay such much kay maykhanay hon

Farz karo yeh rog ho jhoota, jhooti peet hamari ho
Farz karo is peet kay rog main sans bhi hum per bhari ho

Farz karo yeh jog bajog ka hum nay dhong rachaya ho
Farz karo bus yahi haqeeqat baqi sub kuch maya ho

_______ Ibnay Inshah______