maiN chaahtaa huuN kii vo bhii yuuN hii guzartii rahe

vo shoKh shoKh nazar saaNvlii sii ek laDkii
jo roz merii galii se guzar ke jaatii hai
sunaa hai
vo kisii laDke se pyaar kartii hai
bahaar hoke, talaash-e-bahaar kartii hai

na koi mel na koii lagaao hai lekin na jaane kyuuN
bas usii vaqt jab vo aatii hai
kuchh intizaar kii aadat sii ho gaii hai mujhe
ek ajnabii kii zaruurat ho gaii hai mujhe

mere baraanDe ke aage yah phuus kaa chhappar
galii ke moD pe khaDaa huaa saa
ek patthar
vo ek jhuktii hui badnumaa sii niim kii shaaKh
aur us pe janglii kabuutar ke ghoNsle ka nishaaN

yah saari chiizeN ki jaise mujhii meN shaamil haiN
mere dukhoN meN merii har khushii meN shaamil haiN

maiN chaahtaa huuN kii vo bhii yuuN hii guzartii rahe
adaa-o-naaz se laDke ko pyaar kartii rahe

Nida Fazli