ek nazam

dukh dard meN hameshaa nikaale tumhaare khat
aur mil gayii Khushii to uchhaale tumhaare khat

sab chuuDiyaaN tumhaarii samandar ko sauNp diiN
aur kar diye havaa ke havaale tumhaare khat

mere lahuu meN guuNj rahaa hai har ek lafz
maiN ne ragoN ke dasht meN paale tumhaare Khat

yuuN to haiN beshumaar vafaa kii nishaaniyaaN
lekin har ek shae se niraale tumhaare khat

jaise ho umr bhar ka asaasa Ghariib kaa
kuchh is tarah se maiNne sambhaale tumhaare khat

ahl-e-hunar ko mujh pe Wasii etraaz hai
maiNne jo apne sher meN Dhaale tumhaare khat

Wasi Shah